RISEN CHRIST LENT/HOLY WEEK PLAYLIST

Sunday, March 13, 2011

ANG TAÓNG CRISTIANO: Panahon ng Cuaresma by The Lord Reigns Church - Los Baños

Ano ang ibig sabihin nito? Ito ay hango sa salitang Latin (quadragesima) na ang ibig sabihin ay 40 araw bago ang Pasko ng Pagkabuhay (Cuadragésimo día antes de la pascua) at pumapatungkol sa isang kaugalian ng batang Iglesya kung saan may kabuuang 40 oras na pag-aayuno ang ginagawa ng mga tao bago nila ipagdiwang ang Linggo ng Pagkabuhay. Kilala ang Cuaresma sa Ingles sa tawag na “Lent” na nagmula naman sa salitang “tagsibol” (spring) at “paghaba” (lengthen) – patungkol sa unti-unting paghaba ng oras ng liwanag ng mga araw mula noong Pista ng Kapaskuhan hanggang sa Linggo ng Pagkabuhay. Ang panahong ito ay nagtatagal ng 40 araw mulaMiércoles de ceniza (Ash Wednesday, Marso 9) hanggang Linggo ng Pagkabuhay (Abril 24).


Habang ating hinihintay ang Linggo ng Pagkabuhay hinihimok tayong magsuri sa ating mga sarili habang ating inaalaala si Cristo at ang Kanyang pagtubos. Siya ang ating halimbawa, at sa 40 araw na ito ating sinisikap ang mas masigasig na pakikipagbuno laban sa mundo, sa mga pita ng laman, at sa Diablo. Ang ating minimithi ay mas higit na kabanalan, at paglago sa kahustuhan ng isip bilang isang Cristiano at pagsunod sa Diyos.

Sentral sa isang taimtim na pagdiriwang ng Cuaresma ang pagsisisi. Ang tunay na pagsisisi ay kakakitaan ng tunay na pagbabago ng kalooban ukol sa mga aspeto ng ating mga buhay kung saan kailangan tayong manumbalik sa Diyos. Ito ang dahilan kung bakit walang kabuluhan ang pagsunod lamang ng mga panglabas na paggunita sa Cuaresma, gaano man ito karelihiyoso o kahirap. Gayun din ang paggunita ng Cuaresma ay hindi isang “guilt trip” kung saan ang pokus ay tanging sa sarili na nagdadala lamang ng higit na kawalang ng pag-asa.

Ang pokus ng tunay na pagsisisi ay ang Diyos na banal at mahabagin. Kaya ang pagsisising Cristiano ay kakakitaan ng pananampalataya sa Diyos, pagtitiwala sa Kanya at pagtugon sa Kanyang biyaya. Bagama’t atin pa ring nararamdaman ang bigat ng ating kasalanan at lungkot, hindi tayo nadadaig nito sapagkat ating alam at pinagtitiwalaan ang kabutihan Niya patungo sa atin.

Ang Cuaresma ay hindi panahon ng pag-alaala o pagbubulay-bulay lamang sa mga pangyayari patungkol sa pagdurusa ng Panginoon habang Siya ay nabubuhay rito sa lupa. Ito ay magandang pagkakataon para sa isang taimtim na pagsusuri ng sarili at pagsisisi, magin ng pagaayuno (Lucas 5:34-35). Ang tampok na araw ng panahong ito ay ang Biyernes Santo kung saan ating inaalala na ipinako ang Panginoong Jesu-Cristo sa krus para sa ating mga kasalanan.

Tuesday, March 8, 2011

Ang Mabuting Balita Ayon Kay San Mateo 7:21-27. Marso 6, 2011

-Noong panahong iyon, sinabi ni Hesus sa kanyang mga alagad: "Hindi lahat ng tumatawag sa akin, 'Panginoon, Panginoon,' ay papasok sa kaharian ng langit, kundi yaon lamang sumusunod sa kalooban ng aking Amang nasa Langit. Pagdating ng huling Araw, marami ang magsasabi sa akin, "Panginoon, nangaral po kami at nagpalayas ng mga dimonyo, at gumawa ng kababalaghan sa iyong pangalan". At sasabihin ko sa kanila: "Kailanman'y hindi ko kayo nakikilala. Lumayo kayo sa akin, mga mapaggawa ng masama!".

-"Kaya't ang bawat nakikinig at nagsasagawa ng mga salita kong ito ay matutulad sa isang taong matalino na nagtayo ng kanyang bahay sa ibabaw ng bato. Umulan ng malakas, bumaha, at binayo ng malakas na hangin ang bahay na iyon, ngunit hindi nagiba sapagkat nakatayo sa ibabaw ng bato.

Ang bawat nakikinig sa aking mga salita at hindi nagsasagawa nito ay matutulad sa isang taong hangal na nagtayo ng kanyang bahay sa buhanginan. Umulan ng malakas, bumaha, at binayo ng malakas na hangin ang bahay. Bumagsak ang bahay na iyon at lubusang nawasak."


-Ang Mabuting Balita ng Panginoon.

-Pinupuri ka namin , Panginoong Hesukristo.